𝗠𝗶 𝗛𝗮𝗺𝗽𝗵𝗮 𝗠𝗶 𝗞𝗮𝗮𝗺𝗽𝗵𝗮 𝗕𝗼𝗴𝘆𝗼𝗸𝗲 𝗔𝘂𝗻𝗴 𝗦𝗮𝗻

Zosuan laka kihel Asho minam bangkua sung pan 1915, February 13 nia Magwe khawk, Natmauk khuata khata piang Aung San pen 1933 kuma Rangoon University a lut pan siamsin makai, 1938 kuma Dobama Asiayone (We Burmans Association) a lut pan kipawlna makai, 1941 kuma Thirty Comrades leh Burma Independence Army (BIA) a phuh uh pan minam makai a suah hang 1945, March kha dong makaipi panmun taktak (President or Chairman) len ngei lo hi. Makaipi panmun a let sung March 1945 - July 1947 kikal, kum 2 leh kha 3 val deuh bek hi.

1944, August kha in Japan lehdona ding leh Burma suahtakna sualna ding kipawlna, Anti-Fascist Organisation (AFO) kiphut in, tua AFO pen 1945, March 3 niin Anti-Fascist People's Freedom League (AFPFL) kici kik ci leng, 1945, March 27 nia AFPFL President a suah pan Aung San in makaipi panmun taktak len pan hi. 1946, September 28 nia Burma Executive Council ah Deputy Chairman (5th Chief Minister or Nanzinvuan; Chairman pen Governor) dinga a kiguan teh Aung San pen gam makai cih theih pan lai hi. Tua zong kha 10 kiim bek seem pan cihin 1947, July 19 nia cabinet meeting a neih lai-un kikap lum dih laizang hi.

Aung San in AFPFL ah President a sep lian leh UK kumpi ah Burma independent a pe nuam Labour Party a kah kituak citciat hi. Kum nih sunga Burma independence laikhia theipa leh ‘Father of the Nation’ a suak thei ziau Aung San pen ‘Mi Hampha leh Mi Kaampha’ cih loh theih loh hi. Bang hang hiam cih leh, Aung San lo zong Burma makai taak Kawlte a tawm hi lo hi. Ama maia Chief Minister seem ngei U Ba Maw (1937-1939), U Maung Pu (1939-1940), Galon U Saw (1940-1942) leh Sir Paw Tun (1942-1942)-te zong kumpi seem taak vive zah donga mi gina hi khin uh. Cihnopna ah AFPFL President seem thei ding mi dang zong a om lua hi.

Japan thuthu-a Burma a om hun 1942-1945 sunga Burmese political leader dinga a zat uh Thakin Tun Oke leh Dr. Ba Maw hi in, Major General Aung San pen a min than vangvang hang political leader hilo galkap lam makai bekin kikoih hi.

Hih i genna pan, Aung San pen thupi kei cihna hi pah lo, makai i cih pen Pasian sehsa om cih theih, tuate a hun lian teh hong kilaak ahih manin hampha kampha zong cih theih hi. Aizong amau hang beka lawhcinna om thei cih zah donga kisialpih ding hi liang lo. A gualzawhna dingun a thek mi tampi a om lam i phawk kul. Kum 2 makaipi sep sunga Father of the Nation lawhkhia thei Aung San pen thupi lah thupi, kampha lah kampha hi, tua lai amah kum 32 bek pha pan.

Ciapteh mawkmawk dingah AFPFL pen Thakin Soe leh Thakin Than Tun makaih Communist Party of Burma (CPB), Aung San makaih Burma National Army (BIA) leh socialist Kyaw Nyein, Thakin Chit, Ba Swe-te makaih People's Revolutionary Party (PRP) teng kipawla phuhkhop hi.

1936 𝗕𝘂𝗿𝗺𝗮 𝗚𝗲𝗻𝗲𝗿𝗮𝗹 𝗘𝗹𝗲𝗰𝘁𝗶𝗼𝗻 𝗥𝗲𝘀𝘂𝗹𝘁

United GCBA - 46

Poor Man's Party - 16

Hlaing-Myat-Paw GCBA - 12

Komin Kochin Aphwe - 3

Fabian Party - 0

Independent Party - 0

Independents - 14

SUB-TOTAL 91

Karen reserved seats - 12

Commercial reserved seats - 11

Indian reserved seats - 8