Tuni khualak ka vaakna ah papi khat ka phuul kha a, "Sorry, hong maisak in maw" ci'n ka thuum pah hi. Aman "Kei a khial hi zaw ingh ei" hong ci a, ong nuihsan hi. Ka nih un kamsiam kipaih in maitaisa in ka kikhen uh hi. Nitaak ciangin inn ka ciah a nitaak an ka huan hi, Ka geiah ka tanu paulo phunlo in na ding khinkhian hi. Bel khat la dinga ka kihei laitak ka tanu ka phu kha a, Tuuk dektak ka hihmanin "Mihainu, paikhia!!" ka ci kha hi! Tua zan ka ihmu a, ka mangah Pasian in thu hong gen hi. "Na theih ngei loh khat tungah kamsiam mahmah napi cin, Bang hangin na tanu tungah kamguh pau na hiam? Na anbuuk kongkhak geia paakpalh kia na mu ding hi. Tua paakte pen na tanu in nang ading bek ngiat a, Paak huan sung pan khuavot thuakin hong lawhsak hi. Hong piak kaal ding ngakin na geiah a ding gige hi" hong ci hi. Ka khanlawh ciangin anbuuk sunga paakte kaikhawm in, ka tanu lupna ah pai in, a geiah khuukdin in ka nam hi. "Tho dih ve bawi, hih paakte nong puak maw?" ka ci hi. Ka tanu hong khanglo in hong nuihsan a, "Nu aw, tua paakte nang a dinga kong lawhsak hi. Paakte hoih, nang zong na meelhoih lua hiven Nu, A diakin paak eng tawh kilawm lua ding hivecin. Paak eng na deih hia Nu" hong ci ngeungeu hi. "Tuni a thupiang hangin hong maisak in maw bawi, Nidang ciang tua bangin hong taai nawn kei ning maw" Ci in ka tanu khut nam in ka thuum hi. "A hi thei lua hi. Ken hong ngai veve ingh Nu aw, Paak eng na deih hia Nu" hong ci leuleu hi. Tua kawm in hong nuihsak ciuciau hi! "Ken zong hong ngai lua, hong it lua ingh ei bawi. Paak eng nong lawhsak zong hoihsa lua ingh" Ka cih khit ciangin ka nih un kikawiin ka lum khawm uh hi. Lam Thang Zomi Quavadis
Post a Comment