Zogam Dialkhai, Zogam Flag vai Mimal muhna:
Zomi Innkuan USA, ZIUSA Kipawlna ah Kum 6 sung panmun bullam len kha leh hun tampi piakhia in ma napang ingh. Ka mapan sung tawntung Kei let department a hihloh hang Media lam a sempen khat in ma napang ingh. Tua hun sungteng khempeuh LZI Flag, Dialkhai vive promote in zangden ingh.
ZIUSA kipawlna makai hihna pan 2018 kum July kha pan khawl, Tawlnga in ZNTV News taangkona 2018 Kum december kha pan kipan thei ingh. Tuazawh a sawtlo 2019 kumcil lamin ZIUSA Vaihawmna tawh Zomi International Conference, Kualalumpur, Malaysia ah bawl ding vai ong om ciangin thupisa in ka na angtang mahmah hi. Hih vai ah innteekpi a sem ZIUSA makaite lampan invite na ka ngah khatammaw ci-in kei tumtak in ka na lamen mahmah a, Invite na bangmah ngahkhalo suak ingh.
Kum tampi i tha sanna kipawlna khat in ong mangngilh baih si e maw ci-in mimal in khasiatna leh thanemna zong ka nei hi. Bangbang aizongin kei ka kihelloh hangin hipen Leitungbup a huam, Zomi International khawmpi himawk a hihmanin thupisakna leh panpih nopna tawh $ 500, Pu Nunpi kiangah na pia ingh. Khawmpi ong kibawl in, Leitung kiu 4 pana paikhawm Zomi makaipiteng every corner, Party namkim, Kipawlna namkim pan makaite ka muhciangin thupi sa in ka khava mahmah hi.
Khawmpi a manciangin Khawmpi pan thusuahzong kiciantakin ong bawl uh a, manpha kasa mahmah hi. Thusuah dang tampite lak ah Leitungbup a om Zomiteng in Zogam dial khai, Zogam Flag dingin kipsakna a neihna vai uhzong kihel ahihmanin, Kei mimala ka kihelna ahihloh hangin hizah a, Leitungbup tuam a om, Zomi makaipite kipsak Dialkhai pen zatpah ding hoihsa in, ZNTV nasepna khempeuh ah hih Zomi dialkhai penmah kipsak in kizang tawntung hi.
Note: Hih khawmpi ah utpipi in sapna ngahlo kahihmanin kihel khalo hing. $ 500 tawh mapang veve hing. Kei kihelna a hihloh hang, A tamzaw thukimna leh kipsakna pen zahtaksak mahmah hing. Zogam Dialkhai it in zatsawm tek ni.
Tual Sawm Lian
ZNTV
Nov 10,2022
Post a Comment