Post-Spring Revolution (Khaalpal Gaaldona Khit) ciang-in thukawng hong koici kihei theiding (posibilible outcome) thute lungngai khol-a (Zomi I' nuntaakpih sawmleh) naakpi kiginkholhna (preparation) bawlding akuúl leh akisam apoimawh penpen hiding-in ummawh-ing.
Banghanghiam cihleh, "Mipi' teelcing MP vive-tawh akiphut CRPH/NUG ahihi" ci-in leitung buppi-ah NUG upate' tawsawnna-tawh kipulaak kawikawi-in theihpihna leh thukhaámzil saankip gamukpawl (legitimate government) ding-in maa kipang-in, eizong I-panpih ahihi.
Tuhun ciang-in NUG-in 2025 vaái siankum ding-in kamkhap leuleu-a, tua sung-in gamdang pan-a huhna sum tampi-tawh alei-uh gaalvan khempeuh phial (lawng 120 longal) lamkaal-ah SAC khutsung tung ziauziau-a, amau sung nangawn buaimang-in mipi leh PDF paltan hoihkhom anei mite' lungkimlohna hongging giahgiah tahi.
Tua kawmkawm-in Zomi mapanna-pen NUG level-ah bangmah akidawk khop omlo-hi, banghanghiam cihleh Chin State sung-ah ki-om ahihman-in Zomi-in atuam-a Self-adminitered Zone genloh District nangawn ciantak akineilo ahihman-in NUG vaaihawmna khempeuh CNO, CNA, CNDA tawn-in akidawhsawn dinmun ahihi. Tua-ah phawk giugiau-a kidopding kisam-pen "Chin min apua Laimite' Politics" ahihi.
I-ciakciak gawpmang teei hang-in Laimite' politics tutadih akibaan dek naáilo ahihi, ahang-pen Chin State-a minam khempeuh "Zomi hikhin uhhi" cih uplehsaanna-in hong tokzau tawntung-a, Zomi movement-in maáinawt thei mahmahlo ahihi.
Amaute-in Zomi akimelh seemseem ding-in Chin Supreme Council, Chin Human Rights Organisation, Chinland Joint Defence Committee, Chin National Organisation, Chin National Front/Army.... cihte-tawh saupi khual-in mapang-uh ahihlam theikim hihang.
Tutadih SAC do talehang, do takeilehang Chin State sung-ah Post-Spring Revolution hun' ading-in Zomite' ading kilamdanna or phattuamna lianpi omlo dinghi. Tutadih eileh-ei kizuakthaangna-tawh Zomi-in minsiatna ngah mahmah bilbel hihang. Kuama' hongzuak hilo-in Zomi akici ciatciat akizuakthaang hizenhi.
Minam it I-hihleh Zomi min-tawh kipawlna khatpeuh-in thusia abawlleh eimi sung-ah kipulaak, kigen, kihap, kitawng,,, poi hetlo-hi. Kawllai peuh-tawh social media tuamtuam-ah kipholaak, kiko cihte-pen minam itte' ading-in Tuunnu' tawleém, Zuapa' maái cilphihte kisuak-hi.
Tua hi-in, eileh-ei mindai nading cianglel ding-a thautawi-pen I' luangkham mapanna pantaák hetlo-hi. Nulehpate lungkham leltak, eimah-zong paallaaini mawkbei leltak kasa mahmahhi. Luangkham-a mapanna-pen thumaan-tawh, thutanna-tawh mipi hum nading ahihkeileh SAC do pak nading ciangbel hun leh thatang leh sumlepaai paammaih lua-hi.
Tua ahihman-in Zomi minpua thautawi khempeuh mapan khopding cihpen abaih hetlo: pawlmin khahsuah nuam nawnlo-a tunna ciangciang atung hilel, pawlmin khia loding cih lungsim Zomi sung-ah khauhdeuh laailaai ahihman-in baihlo dinghi, ahizong-in minam' ading alemtaang theipen "Acidam Kizopna Neihding" ahihi.
Mipi lak-ah kihelna-ah atuam hiding-a, Zomi thautawite' kizopna atuam vilvel ahihding akisam penpen ahihi. Thautawi namdangte-in eisung thuguipi/thusim atheih kisam lohi. Zomi thautawi kipawlna khempeuh-in tuabang atuam thusim nei-a geelna a-om keileh Chin State khawvel-ahbel Zomi kilangh zo nawnlo dinghi.
Hihbang I-gen sim-in Spring Revolution brainwashed teng-in NUG' sang-a SAC panpihzaw cih atoi leh akawciik etna-tawh mu pahpah-a, tua-in sawtpi (longterm)' ading ngaihsutna leh thumuhna khempeuh mengcip pahpahhi.
Kizopna kisamhi. Athuúk kizopna kisamhi. Ahilo nonote kipolhkhia gawpgawp-a minam kipawlna minpua khatpeuh mindaisakna cihte social media-ah Kawllai Manglai khawngtawh tun pahpah nawnlo-in, kiho tuahding, kikupding, kinialding, kitawngding, thukhupna khat-ah mualsuak theiding ngaihsutna khangkhaan tading hihang.
Ka' theihkhial keileh kipawlna makaáite approachable vive hisaam ding-in ka'ummawhhi. Kiho naailo-a kihta giugiau, kiho naailo-a kihoding lau giugiau cihte meidawina lianpi ahihi. Meidawite kalsuankhial baih mahmah ahihlam phawk-in amanpha haangsanna neih theihding haanciam hunta-hi.
Zomi apil asiam, ahau leh mihau makaai uliante-in hong ngaihsun teitai tapeuh un.
Zomi Pasian' Thupha!
Pu Zo Khai
Ahi lua hi Hidan lai tampi pi ong khahkhia un, mipi muhna theihna atawm man in aki gen khempeuh ki uma thupai zia ka theikei uh hi
ReplyDeleteLungdam Pu Zo Khai.